Mon site SPIP

At Waggag

amawal — 2010-09-05T21:39:58Z

At Waggag d taddart taqbaylit deg Berǧ Bu Σrariǧ, lebni-ines d aqbur (d aqdim), aṭas n yexxamen i mazal bedden akken ttwabnan zik. Ass-agi tuget n At Waggag fɣen, ttidiren deg temdinin ; wid yeqqimen deg taddart amzun ttwattun imi allalen n tudert ur ten-wwiḍen ara.

Taddart-agi Iwaggagen tezga-d lewhi n 10 Km akin i At Sidi Brahim i d-yezgan deg webrid yettawin ar Stif, qbel Lemhir iwumi qqaren zik Imaẓiten. Tddart n At Sidi Brahim daɣen d taqburt u tesεa amezruy meqqren yagi deg Tegrawla n 54, dinna i llant Tiggura n Wuzzal ("Portes de fer").

Deg waggur-a n ɣuct yezrin, newweḍ ar At Waggag sin iberdan.

Tikkelt tamezwarut, nekka s Lemhir, neṭṭef abrid yettawin ar Tamsilt (Msila), nedda kan lewhi n 4 Km ssyin nezzi yeffes d webrid yettawin ar Herraza d Ben Dawed. Abrid yelha maca ugar n 25 Km i wakken ad naweḍ ar Herraza. Dinna, nkles-d kra imezdaɣ, kra yexxamen iqdimen, ssyin nkemmel ar Fḍala anida tella Tɣiwant i-ɣer cudden At Waggag. Ur neqqim ara aṭas deg At Fḍala acku ur telli wara d taqburt : tugett n lebni d ajdid. Nnan-aɣ-d kra imezdaɣ ma tebɣam lebni n zik ruḥet ar At Waggag. Abrid yekker akk, ulamek ara ad nɣiwel, dɣa ddeqs i neqqim i wakken ad naweḍ.

Deg At Waggag, imezdaɣ muggren-aɣ-d deg waṭas yid-sen, imi ẓran d iqbayliyen yettnadin ɣef umezruy d weḥraz n tmussniwin n zik, ferḥen aṭas u fkan-aɣ azal meqqren. Mmeslayen-aɣ-d aṭas ɣef umezruy-nsen s lɣiḍ d ameqqran imi kra ixedmen deg Tegrawla, taddart-nsen ass-agi tettwattu, ur sεin ara akk allalen n tudert, arrac-nsen ur xeddmen ara iḥettem-iten lḥal ar yinig alammi tuget n imezdaɣ fɣen, wa deg Lezzayer, wa deg Fransa...

Tis-snat, nekka s yiwen webrid yegzem, qbel Lemhir, nezzi yeffes neṭṭef abrid d asawen. Nεedda ɣef yiwet taddart texla ! Imezdaɣ-is akk fɣen rewlen seg rrebrab ! Ass-mi newweḍ nufa ttrajun-aɣ deg tejmaât, nemmeslya cwiṭ, nefka-yasen allal usekles nuɣal-d.

Lemmer ad tili twizi, d ayen igerrzen aṭas ma nεawen At Waggag i wakken ad rren ixammen yeɣlin imi aṭas n umezruy i refden ! Yerna lemmer ad tuɣal taddart akken tella, aṭas n yemdanen ara d-yettasen ad ẓuren dɣa tadamsa ad tennerni kra, imezdaɣ ad jguglen deg wakal-nsen ur ttinigen ara.

Afulay

Tajmilt i Muḥya

amawal — 2010-05-16T23:29:28Z

Llan kra n yemdanen ran ad as-rren tajmilt i Muḥya, ufan-d tikti-agi :

1)- Ass n 01.11 d azemz n tlalit n Muḥya.

2)- Ihi nenna-yas a d-neslalet tarbaεt, yal yiwen, yal yiwet d wacu ara d-yelhu(d ineγlafen war lparlumu :-)).

Llan kra n yemdanen ran ad as-rren tajmilt i Muḥya, ufan-d tikti-agi :

1)- Ass n 01.11 d azemz n tlalit n Muḥya.

2)- Ihi nenna-yas a d-neslalet tarbaεt, yal yiwen, yal yiwet d wacu ara d-yelhu(d ineγlafen war lparlumu :-)).

3)- A d-nemmubilizit ayen iwumi nezmer n yeqbayliyen yellan di Lpari neγ anida-nniḍen.

4)- Yessefk Iqbayliyen akk ara yettekkin ad ilin di trebbuyeε

5)- Yal tarbaεt ad tesεu lmendub(am laqasma)

6)- A d-nciwret kan imḍebbren n lalla Miri(taγiwant) n Lpari

7)- Irumyen yessefk ur ẓerren acemma

8)- Mi ara d-yaweḍ wass-nni, a d-nemlilet akk di Lpari tis-snat, a d-nini γef 10:30

9)- Yal tarbaεt anwa abrid ideg ara tili, annect-a ad nemsefham fell-as si tazwara.

10)- Yal tarbaεt s lekwaγeḍ-is deg ifassen, s wayen ad as-nefk n wayen yura Muḥya(isefra, amezgun...atg.)

11)- Mi d-tewweḍ 11:00 n wass, am lecyax mi ara teddnen, yal yiwen, yal yiwet a d-qqaren deg iberdan s leεyaḍ tukkist n wayen yura Muḥya à la Muḥya yerna ala taqbaylit ara yesdeqdigen di Lpari tis-snat.

12)- Irumyen imiren ad steqsayen, ad ẓren anwa i yellan yedder dinna yid-sen, yeznuzu-yasen Lalimuntasyun jiniral.

13)- ad asen-naru s tγumit-nsen tudert n Muḥya, di lekwaγeḍ ara sen-nefk.

14)- γef 12:00 a d-nemlilet akk di la rue d'Amboise, zdat n wanida yella yesεa taḥanut, ad nessiγet ticemmaεin, ad necnut...atg.

15)- A d-nessaken daγen s Muḥya nesεa tameslayt, nesεa idles...atg.

16)- Yessefk ur yettili ara yakk deg-s lkumirs, brtv tezmer ad teqqim di 93.

Widak d tidak iγef ara teffeγ tekti-agi zemren(t) ad ttekin(t) neγ ad fken(t) afus akken-nniḍen, ladγa s usufeγ n wawal. Ihi wa ad yeqqar i wayeḍ !

Leqdic ilmend n waya la yetteddu di facebook, tzemrem(t) ad twalim(t) dagi :

http://www.facebook.com/ ?ref=logo# !/pages/Tajmilt-i-Muya/111312582244188 ?ref=ts

Ssi Tadir

Meksa Σabdelqader : amuli wis-56 n tlalit-is

amawal — 2010-04-07T03:22:50Z

Meksa Σabdelqader d acennay ameqqran n teqbaylit. Ilul ass n 4 Yunyu 1954 deg taddart n Mira deg tɣiwant n Tmizart i d-yezgan deg lɛerc n At-Jennad (Tizi-Wezzu). Asmi i yeweḍ 6 iseggasen deg usemmud-is, yedda d imawlan-is ar temnaḍt n Blida anda i yeqqim dina aṭas n yiseggasen send ad iṛuḥ ad yezdeɣ deg « la pointe pescade », deg tama n Buluɣin deg Lzzayer tamaneɣt. Γer 22 iseggasen-is, yunag ɣer Fransa, deg Épinay-sur-Seine, deg temnaḍt n Paris. Yella ixeddem deg tsenselkimt, yettidir d yiwet n tṛumit imi qqaren Nathalie. Deg useggas n 1980 yesɛa-d yid-s taqcict i wumi yefka isem amaziɣ : Masiba.

Γerr tameddurt n Meksa deg wadeg www.tameddurt.com

Tizlit Anzar seg uḍebsi Taɣuzi deg yidles

Anzar ! Anzar ! …
Ad teww nneɛma n wedrar
Anzar ! Anzar !
Ad ternu tin n uzaɣer
Ass-a ad ncebbeḥ i uɣenja
Ad d-nezzi meṛṛa i tudrin
Ad necnu mačči d kra
Tulawin s teɣratin
A Anzar awi-d lehwa
Ad swent akk tebḥirin
Anzar, Anzar ...

A Anzar awi-d aman
Kkawent tferkiwin
Tesliḍ meṛṛa s yisallen
Ttxil-k uɣal-aɣ-d d aɛewin
Awi-d kra din i yellan
Yeẓra yired d temẓin
Anzar ! Azar ! ...

Akalyefud ur yeswa
Kkawent ula d tizemrin
Tala tuɣal s nnuba
Ḥejbent fell-as tlawin
Newwi-k d acewwiq i cnna
Ttefrent fell-ak tudrin
Anzar ! Anzar ! ...

Racid At Aɛli-U-Qasi

Tameɣra i twizi deg Villejuif ass n 10 Yebrir

amawal — 2010-04-06T23:52:02Z

Ilmend n uḥami n umuḍin Buεziz Ḥasan akken ad idawi deg temdint n Toulouse (Fransa), ad ken-nenced ɣer tmeɣra ad d-yilin ass n Sed 10 Yebrir 2010 seg 12:00 almi d 17:00 deg tzeqa L'oriental Feeling.

Tansa :

75, Avenue de Paris
94800 Villejuif
(1300 m seg Porte d'Italie m'ara teṭṭfem abrid N 7)

Amitṛu : Uṭṭun 7, addud Villejuif Léo Lagrange.

Illit aṭṭas yid-wen, akken aqcic-a ad yefreḥ.

Icenayen ara yilin deg tmeɣra :

Aεli Ideflawen
Farid Sameur
Kamal Igman
Ccix Σellawa
Laxḍer Sennan
Ferḥat Igerca
Karim Yeddu
Tarbaεt n ceḍḍeḥ Tilleli
Gadri (seg tefriqt tabarkant, icennu Maεtub)

Ad ilin diɣen inebgawen γer-wen am Lexḍer KABAC d Lamia MAḥyut

I ugar n yisalen, ssiwlet ɣer :06 59 17 68 00

ANṢUF YIS-WEN

Malik KABAC

Arazen i yinelmaden n Tmaziɣt yufraren

amawal — 2010-03-12T14:03:46Z

Tiddukla tadelsant Afulay n Mdawruc tettheggi-d yiwen usenfaṛ icudden ɣer uselmed n Tutlayt Tamaziɣt. Tra ad tessebɣes inelmaden yufraren deg ukayaḍ n BEF d win n BAC. Ger warazen ar yttunefken, ad ilin iselkimen, allalen usekles (camescopes, dictaphones) d waṭas n yidlisen. Wid iran ad kkin deg usuddes n usenfaṛ-agi, ad d-arun ɣer izen@apulee.com

Akka kra n wussan, ad d-nawi awal s teɣzi ɣef usenfaṛ-agi.

Afulay

Tala n Ulili : Tajmilt i Dda Lmulud sɣur Ɛumar Derwic

amawal — 2010-03-07T15:12:53Z

Nufa-n Tala n Ulili
Tessemḍay alili ;
Tenγa-kem a tilelli
Tessiger i yimeṭṭawen.

Izri urgaz n lεali,
Ul d tasa n tamelli ;
Γer sdat iga tikli
Ira akk imdanen.

Nufa-n Tala n Ulili
Tessemḍay alili ;
Tenγa-kem a tilelli
Tessiger i yimeṭṭawen.

Izri urgaz n lεali,
Ul d tasa n tamelli ;
Γer sdat iga tikli
Ira akk imdanen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Isra am uḥuli,
Aṣemmiḍ ur illi
Acengu n tfeḥli
Ay d as-hilli imedyen.

Ayt Mεemmer isli
Mi ittwaker umulli,
Itri-nnes aha yuli,
Da ismuyud iεdawen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Neswa deg Tala n Ulili
Tayeḍ am yiḍelli ;
Imal diγ a nwali
Timerẓag itteqqlen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Iɣil Σebbuda (Leqser) deg 16 ɣuct 2941 / 04- 08- 1991

Tameddurt s tegzel n umedyaz

Ilul Σumar DERWIC deg yiγrem n Igelmimen deg ugmuḍ anẓulan n tmurt n Meṛṛṛṛṛɣɣṛṛṛṛṛṛṛrṛṛṛruk. Iga aselmad deg uγerbaz ideg ababat n kraḍ n warraw. Iga, diγ, amaslaḍ deg tmesmunt tamettit tadelsant Tilelli n Tizi n Imnayen (Gulmima) deg Merruk.

Yessuffeγ-d ammud-nnes amezwaru n isefra imsinetlayen (tamaziγt - takaṭalant) ilan azwel ANFARA, deg tmurt n Kaṭalunya deg wayyur n ma¨s n useggwas n 2955 (2005).

Agaluz n tfarest-nnes tadyazant akk d tseklant (imagraden d yisuɣal d tallasin), ittwarun, s tumast, s tutlayt tamaziγt illa ittwaẓreg deg yitsent tesγunin timerrukiyin d tmezγarin.

Σumar DERWIC

Tiddukla Tadelsant Numidya : Tinubga ilmend n wass agerɣlan n tmeṭṭut

amawal — 2010-03-06T22:00:14Z

Ilmend n 08 Meɣres 2010, ass agraɣlan n tmeṭṭut, tiddukla Numidya thegga-d ahil adelsan akken ad tesfugul tameɣra-yagi, akken ad terr tajmilt i tmeṭṭut. Ahil-agi d win ara d-yilin ass n 8 Meɣres 2010 deg wexxam n tiddukla Numidya ad yili d tunṭict i yakk tulawin.

Asarag
Tamedyazt.
Asaru d weskasi.
Tarmest.

Tameɣa n ccna akk d Younes Ressous

Deg :
Axxam Umezgun Aẓiyan n Wehran Ɛebdelqader Ɛellula
Ass : 12/03/2010
ɣef : 16:00
Azal : 100 Idinaren

Ǧamal Benɛuf

Aneggaru a d-yerr tawwurt : Seg Batent, Aqbu, Iɣzer Ameqqran, Tazmalt, At-Maɛuc ɣer Wehran

amawal — 2009-12-27T02:41:55Z

Tarbaɛt « TIGAWT D WAWAL » iḍera-as-d “warraz n tseqqamut inezzurfa” deg tfaska tamenzut umezgun amaziɣ yeḍran di Batnet, seg 10 ar 18 Duǧamber 2009 ; ilmend n tmezgunt “Aneggaru a d-yerr tawwurt, yeččur wesqif n ṭṭmana”.

« Mazal lxir ar zdat » I yenna Muḥya.

Ahil (programme (ihanayen) [1] :

Ass n Sem 11/12/2009 ɣef 17:00. Deg tzeqqa umezgun aẓiyan “Ɛebdelqader Ɛellula” n Wehran (T.R.O)

G.M : D tajmilt i Muḥya d Buɛlam Ǧennat.

Ass n Warim 14/12/2009 ɣef 19:00. Deg tzeqqa umezgun aẓiyan n Batnet (T.R.B)

G.M : Ilmend n tfaska umezgun amaziɣ.

Ass n Sed 26/12/2009 ɣef 20:00. Deg tzeqqa [2] Aqbu.

G.M : Ilmend n tfaska n tmedyazt tamaziɣt.

Ass n Ačer 27/12/2009 ɣef 19:00. Deg wexxam n yelmeẓyen n Yeɣẓer Ameqqran.

G.M : Ilmend n tfaska n tmedyazt tamaziɣt.

Ass n Arim 28/12/2009 ɣef 19:00. Deg wexxam n yelmeẓyen n Tezmalt.

G.M : Ilmend n tfaska n tmedyazt tamaziɣt.

Ass n Aram : 29/12/2009 ɣef 19:00. Deg wexxam n yelmeẓyen n Truna (At Maɛuc)

G.M : Ilmend n wesnubget n tɣiwant At Maɛuc.

Ass n Sem:15/01/2010 ɣef 16:00. Deg tzeqqa umezgun aẓiyan n Wehran (T.R.O)

G.M : Ilmend n Yennayer.

Anṣuf yes-wen(t)

[1] spectacles

[2] Site d'hébergement

Ǧamal Benɛuf

Taqsiṭ Uberri

amawal — 2009-12-16T17:48:45Z

Tagi d taqsiṭ Uberri
Iteddu am umerkanti.
Gar yicenfiren-is yezga
Igirru akken kan i yebda.
Qur-s yiwen wugel bb-ureɣ
Yess yečači yeţaḍsa.
M'ara iteddu yeţleɣwi
Yeţriḥi d labriyenṭi.

Tagi d taqsiṭ n Uberri
Asmi d-yusa si Paris.
Ires-d di lport n Bgayet
Yewwi-d tabalizt meqqret.
Zdaxel yewwi-d adrim
Yerna-d rrupa n leḥrir.

Yekcem ar yiwet n ţberna
Yekcem ad isew lbirra
Yufa ţuraren lkarṭa
Iqerreb ad itekka.
Ur yekfi ara tabyart-is
Ččan-as akk lqecc-is.

Akken i t-ǧǧan ɛeryan
Ladɣa ineggez s aman.
Lɣaci merra tebɛen,
Jelben ɣer zdaxel waman
Mačči akken ad t-id-kksen.
Tebɛen-t akken ad as-d-kksen
Ugel-nni-ines n ureɣ
Winna akkenni s yeceɛceɛ.

sɣur Ccix-Sidi-Bemol, aḍebsi "tuɣac ibeḥriyen"

D tukkist seg tesɣunt ayamun,

Amawal

Tameɣra n Tlelli deg Paris - Tanemmirt !

amawal — 2009-12-08T23:41:28Z

Ugar n dduṛt aya seg-mi tezri Tmeɣra n Tlelli i d-yellan deg tzeqqa n AGECA (Paris) ilmend n wesmekti n Mass Yugurten agellid ameqran n Tmazɣa. Tafsaka d tin iεeddan deg talwit d tumert ɣas akken a ahil d-nhegga ur nessaweḍ ara ad t-nessali akken yella. Deg tazwara n temlilit, inerzaf (inebgawen) ččan tameqfult i d-nehegga deg yixxamen-nneɣ.

Deg tazwara n temlilit, inerzaf (inebgawen) ččan tameqfult i d-nehegga deg yixxamen-nneɣ. Rsent-d tefleflin, lehrisa d zzit n tzemmurt deg teqdḥin n wesɣar. Ddeqs n lweqt i teṭṭef tmečča-agi imi imdanen ur tetten ara akk ɣef yiwen webrid. Dɣa nfuṛes nerra-d tizlit "Yujerten" n Dihya, tacennayt tameqrant n Wawras. Syin, nerra-d yiwen usefru s Tafransist ɣef Mass Yugurten. Akken ssulin yemdanen učči, yemmeslay-d s tewzel, Mass Brahim SLIMANI, aselway n Tiddukla Afulay n Mdawruc ɣef Tmeɣra n Tlelli seld ad yefk awal i Mass Omar U LAMARA i wakken ad d-yemmeslay ɣef wungal i yura ɣef Yugurten (Tullianum, taggara n Yugurten). Imi yessuli awal-is Mass U LAMARA, yerra-d ɣef kra n yisteqsiyen qbel ad yeǧǧ amkan i usarag wis-sin i d-ihegga Mass Messaoud NEDJAHI.

Asarag-agi deg-s sin yeḥricen. Aḥric amezwaru : taɣuri n yiwen weḍris sɣur Kamilya ɣef wayen d-yenna Salluste d weḍris nniḍen i d-teɣra Nadiya anida i teεreḍ ad d-tbeggen anda yeɣleḍ Salluste. Deg weḥric wis-sin, Mass NEDJAHI yemmeslay-d ɣef wayen d-yewwi ɣer yemɣaren u yerra-d ɣef yisteqsiyen i s-d-fkkan imikkiyen. Mass NEDJAHI yefka-d tamuɣli-s ɣef yal tadyant iɣef t-id-steqsan. Dɣa awal yiɣzaf acemma : ur d-yeqqim ara aṭas n wakud i ccna. Imi yessuli usarag-askasi, nesla i temdyazt ẓiḍen aṭas aṭas sɣur Sifaw seg Libya. Ula ma tuget deg yimikkiyen d tikkelt tmenzut ara slen Tanfusit, ssawḍen ad fehmen awalen n umedyaz u fkan-as-d kra n yisetqsiyen iɣef d-yerra s tumert. Syin, nesla-d i weltmas n Dihya, deg kra n tezlatin s Talatinit d Tacawit. D tizlatin, d icewwiqen neɣ d iḥiḥayen ?! Wissen amek i ilaq ad d-iniɣ ! Wid yellan dinna ḥussen i yiman-nsen ttwaseḥren ! Mi tekfa, yecna-yaɣ Mebruk, yiwen ilemzi aqbayli, tizlit n Idir : "Muqleɣ Tamurt n Umaziɣ Yugurten walaɣ udem-is..." . Deg wakken i sen-teεǧeb i medden, ssutren-as ad as-d-yales ! Ar taggara, yewwi-d Brahim yiwen usefru s Tacawit, d asefru i yecna Nwari NEZZAR (Ẓer seddew).

Tiddukla Afulay n Mdawruc tra ad tesnummer akk wid i d-yussan : Tanemmirt-nwen ! Nessaram ad tilim yid-neɣ deg temliliyin i d-iteddun. Win yesεan kra n tamawt ad d-yazen ɣer yugurten@apulee.com

Tameɣra N Tlelli 28 wember 2009
sɣur Afulay N Mdawruc

Afulay